संतोष देशमुख हत्या प्रकरण: सरकारच्या कार्यक्षमतेवर प्रश्नचिन्ह?
प्रशासन, पोलीस तपास आणि राजकीय घडामोडींचा खेळ:
माझा आवाज विशेष प्रतिनिधी
पुणे: ३१ डिसेंबर २०२४
संतोष देशमुख यांच्या हत्या प्रकरणात अनेक प्रश्न निर्माण झाले आहेत. प्रशासनाने 20 दिवसांत तपास यंत्रणा केवळ “तपास सुरू आहे” असे सांगत वेळ काढला, आणि अचानक धनंजय मुंडे आणि देवेंद्र फडणवीस यांच्या काल झालेल्या भेटीनंतर आरोपी वाल्मिक कराडने आत्मसमर्पण केले. हे प्रकरण जसे पुढे सरकत आहे, तसेच सरकारच्या आणि तपास यंत्रणेच्या कार्यक्षमतेवर टीका होत आहे.
घटनाक्रमाचा मागोवा:
- खंडणी मागणी:
विधानसभा निवडणुकीच्या काळात वाल्मिक कराडने पवन ऊर्जा कंपनीकडे ₹2 कोटींची खंडणी मागितली. - हल्ला:
कंपनीने पूर्ण रक्कम न दिल्याने कराडच्या लोकांनी कंपनीच्या वॉचमनला मारहाण केली. - सरपंचाचा हस्तक्षेप:
मस्साजोगचे सरपंच संतोष देशमुख यांनी गावातील वॉचमनवर झालेल्या मारहाणीचा जाब विचारण्याचा प्रयत्न केला, ज्यामुळे वाल्मिक कराडच्या लोकांशी वाद झाला. - क्रूर हत्या:
दुसऱ्या दिवशी वाल्मिक कराडच्या गटाने सरपंच देशमुख यांचे अपहरण करून त्यांची निर्घृण हत्या केली.
मुख्यमंत्री आणि धनंजय मुंडे यांची भूमिका:
संतोष देशमुख यांच्या हत्येचे राजकीय कनेक्शन स्पष्ट दिसत आहे. धनंजय मुंडे यांच्या अतिशय जवळच्या कार्यकर्त्यांनी आणि धनंजय मुंडे यांचे खासमखास वाल्मीक कराड यांच्याशी संबंधित लोकांवर झालेल्या खंडणी मागणी च्या आरोपावरून हे प्रकरण सुरू झाले. घटनांनंतर काल ३० डिसेंबर रोजी मुख्यमंत्री आणि मुंडे यांच्या भेटीची वेळ आणि त्यानंतर आरोपीचे आत्मसमर्पण, यातून एक प्रकारचा “सेटिंग” असल्याचे संकेत मिळत आहेत.
मुख्यमंत्री देवेंद्र फडणवीस आणि धनंजय मुंडे यांच्यावर आरोप:
- फडणवीस हे गृह खात्याचे प्रमुख असूनही आरोपींवर कठोर कारवाई न केल्याने त्यांच्यावर अपयशाचे आरोप होत आहेत.
- धनंजय मुंडे यांनी 20 दिवस शांत राहून प्रकरणाकडे दुर्लक्ष केले.
- वाल्मीक कराड हे स्वतःच्या गाडीतून येऊन पुणे पाषाण येथील सीआयडी ऑफिस कडे येऊन स्वतःसमर्पण केले. यावरून पोलीस आतापर्यंत काय करत होते यावर खूप मोठे प्रश्नचिन्ह उभा राहिल आहे.
प्रश्न अनुत्तरितच:
- 20 दिवसांचा तपास:
तपास यंत्रणा 20 दिवस काय करत होती? पुरावे नष्ट होण्याचा धोका का निर्माण झाला? - आरोपीवर मवाळ भूमिका:
सरपंच देशमुख यांच्या हत्येसाठी थेट जबाबदार असलेल्या वाल्मिक कराडवर फक्त खंडणीचा गुन्हा का दाखल झाला? हत्या प्रकरणात त्याला अटक का झाली नाही? - राजकीय हस्तक्षेप:
धनंजय मुंडे आणि फडणवीस यांच्या भेटीनंतरच आरोपीने आत्मसमर्पण केले. हे “सेटिंग” होते का?
राजकीय नेत्यांची मते आणि समाजाचा आक्रोश:
मनोज जरांगे-पाटील यांची प्रतिक्रिया:
- त्यांनी संतोष देशमुख यांच्या कुटुंबीयांना भेट दिली आणि दोषींना फाशीची मागणी केली.
- “सरकारने प्रामाणिकपणे तपास केला नाही, त्यामुळे पुन्हा आंदोलनाची वेळ येईल,” असे त्यांनी सांगितले.
विरोधी पक्षाचा आरोप:
- “सरकार पुरावे नष्ट करत आहे. सीडीआर आणि व्हिडिओ गायब केले जात आहेत,” असे टीकासत्र सुरू आहे.
- अजित पवार यांच्या गटावरही आणि त्यांच्या सर्व नेत्यांवर मौन बाळगल्याचा आरोप होत आहे.
- वाल्मीक कराड आतपर्यंत कुठे लपला होता आणि त्यांना लपायला कोणी मदत केली? याचं स्पष्टीकरण सरकारने द्यावं? असे सुद्धा आरोप आता विरोधी पक्षाकडून होत आहेत
गावकऱ्यांचा आक्रोश:
- मस्साजोग गावातील ग्रामस्थ सामूहिक जलसमाधी घेण्याची तयारी करत आहेत.
- “सरकारच्या निष्क्रीयतेमुळे न्यायाची अपेक्षा ठेवणे व्यर्थ ठरते,” अशी ग्रामस्थांची भावना आहे.
सरकारसाठी परीक्षा:
मुख्यमंत्री देवेंद्र फडणवीस आणि महाराष्ट्र पोलीस तपास यंत्रणा या प्रकरणाच्या मुळाशी जाऊन सत्य बाहेर आणतील का? हा प्रश्न आहे. दोषींवर कठोर कारवाई होऊन न्याय होईल का? याकडे महाराष्ट्राचे लक्ष लागले आहे.
संपूर्ण महाराष्ट्राची मागणी:
संतोष देशमुख यांच्या हत्येला न्याय मिळाला नाही, तर याचा परिणाम राजकीय पक्षांच्या आणि प्रशासनाच्या विश्वासार्हतेवर होईल. सरकारने या प्रकरणावर तातडीने कार्यवाही करून दोषींना कठोर शिक्षा देणे गरजेचे आहे.
अशा ताज्या आणि महत्त्वाच्या बातम्यांसाठी ‘माझा आवाज’ या बातमी पोर्टलला आणि आमच्या इतर सोशल मीडिया हँडल्सला नक्की फॉलो करा.
