धनंजय मुंडे यांना मंत्रिपदापासून दूर ठेवण्याची मागणी : औरंगाबाद खंडपीठात याचिका दाखल
माझा आवाज विशेष प्रतिनिधी
मुंबई | 31 डिसेंबर 2024
संतोष देशमुख हत्या प्रकरणाचा तपास निष्पक्षपणे व्हावा यासाठी राज्याचे अन्न व नागरी पुरवठामंत्री धनंजय मुंडे यांना मंत्रिपदापासून दूर ठेवण्याची मागणी मुंबई उच्च न्यायालयाच्या औरंगाबाद खंडपीठात करण्यात आली आहे. ही याचिका मृत संतोष देशमुख यांचे बंधू धनंजय देशमुख यांनी दाखल केली आहे.
खंडपीठासमोर काय म्हटले आहे?
ॲड. शौमितकुमार सोळंके यांच्यामार्फत दाखल केलेल्या या याचिकेमध्ये मंत्री धनंजय मुंडे आणि त्यांच्या निकटवर्तीय वाल्मिक कराड यांच्या संबंधांवर प्रश्नचिन्ह उपस्थित केले आहे. याचिकेनुसार, या दोघांमध्ये असलेल्या मैत्रीचा पुरावा म्हणून सुमारे दीडशे छायाचित्रे, सार्वजनिक वक्तव्ये आणि विधिमंडळातील भाषणे सादर करण्यात आली आहेत.
याचिकेत स्पष्टपणे नमूद करण्यात आले आहे की, वाल्मिक कराड यांच्यावर संतोष देशमुख हत्या प्रकरणात सहआरोपी म्हणून गुन्हा दाखल केला पाहिजे. त्याचप्रमाणे, त्यांच्यावर महाराष्ट्र संघटित गुन्हेगारी नियंत्रण कायदा (मोक्का) अंतर्गत कारवाई करण्याची मागणी देखील करण्यात आली आहे.
मंत्रिपदाचा प्रभाव निष्पक्ष तपासात अडथळा ठरतोय?
याचिकादाराच्या म्हणण्यानुसार, मंत्री धनंजय मुंडे यांच्या पदाचा प्रभाव हा या प्रकरणाच्या निष्पक्ष तपासात अडथळा ठरू शकतो. त्यामुळे, तपासावर कोणताही दबाव येऊ नये आणि सत्य बाहेर यावे, यासाठी त्यांना मंत्रिपदापासून दूर ठेवणे अत्यावश्यक असल्याचा याचिकेत उल्लेख करण्यात आला आहे.
खंडपीठाचा पुढील निर्णय महत्त्वाचा
या प्रकरणावर आता उच्च न्यायालयाचे औरंगाबाद खंडपीठ काय निर्णय घेते याकडे सगळ्यांचे लक्ष लागले आहे. राजकीय वर्तुळात या प्रकरणाने खळबळ उडवली असून, यामुळे धनंजय मुंडे यांच्यावर राजकीय दबाव वाढण्याची शक्यता आहे.
अद्ययावत बातम्यांसाठी ‘माझा आवाज’सोबत रहा
अशाच महत्त्वाच्या व विश्वासार्ह बातम्या वाचण्यासाठी आमच्या ‘माझा आवाज’ या न्यूज पोर्टलला नक्की भेट द्या आणि आमच्या सर्व सोशल मीडिया हँडल्सना फॉलो करा.
