झाकीर हुसेन जिवंत आहेत, त्यांच्या प्रकृतीसाठी प्रार्थना करा’: मृत्यूच्या खोट्या बातम्या फेटाळल्या
माझा आवाज विशेष प्रतिनिधी:
संपूर्ण जगाला आपल्या तबल्याच्या अद्वितीय जादूने मंत्रमुग्ध करणारे उस्ताद झाकीर हुसेन यांच्या निधनाच्या खोट्या बातम्यांनी रविवारी रात्री सोशल मीडियावर खळबळ माजवली. राजकीय नेत्यांपासून सेलिब्रिटी आणि चाहत्यांपर्यंत अनेकांनी श्रद्धांजली अर्पण करणारे संदेश पोस्ट केले. मात्र, झाकीर हुसेन यांचे भाचे आमीर औलिया यांनी या अफवांना थेट फेटाळून लावले.
“माझे मामा झाकीर हुसेन हे पूर्णतः जिवंत आहेत,” असे औलिया यांनी X (माजी ट्विटर) या प्लॅटफॉर्मवरून स्पष्ट केले. “खोट्या बातम्या पसरवणं थांबवा. ते गंभीर परिस्थितीत आहेत, त्यांच्या प्रकृतीसाठी प्रार्थना करण्याचे आवाहन करतो.”
73 वर्षीय झाकीर हुसेन सध्या सॅन फ्रान्सिस्को येथील रुग्णालयाच्या अतिदक्षता विभागात हृदयविकाराच्या त्रासासाठी उपचार घेत आहेत. पत्रकार परवेज आलम यांनीही कुटुंबीयांनी त्यांच्या निधनाची कोणतीही अधिकृत माहिती दिली नसल्याचे स्पष्ट केले. “१५ डिसेंबर रोजी १६४० GMT वाजता मी लंडनमधील त्यांच्या मेव्हण्याशी संपर्क साधला. कुटुंबीयांनी अशा कोणत्याही बातमीला दुजोरा दिलेला नाही,” असे आलम यांनी X वर पोस्ट केले.
झाकीर हुसेन यांची व्यवस्थापक निर्मला बच्चानी यांनी सांगितले की, ते रक्तदाबाच्या समस्यांनी त्रस्त होते. “या कठीण काळात आम्हाला सर्वांच्या शुभेच्छा आणि प्रार्थना हव्या आहेत,” असे त्या म्हणाल्या.
सोशल मीडियावर याबाबत अफवांचा पाऊस पडत असतानाच केंद्रीय मंत्री ज्योतिरादित्य सिंधिया, आसामचे मुख्यमंत्री हिमंता बिस्वा सरमा आणि काँग्रेस नेते राहुल गांधी यांसारख्या नेत्यांनी श्रद्धांजलीचे संदेश दिले. माहिती व प्रसारण मंत्रालयानेही “संगीतविश्वाने एक महान कलाकार गमावला,” असे ट्विट केले होते, मात्र नंतर ते ट्विट हटवले.
झाकीर हुसेन हे दिग्गज तबलावादक उस्ताद अल्ला रक्खा यांचे सुपुत्र असून, त्यांना जगातील सर्वश्रेष्ठ वादकांपैकी एक मानले जाते. १९७३ मध्ये त्यांनी इंग्लिश गिटारवादक जॉन मॅक्लॉफलिन, व्हायोलिनवादक एल. शंकर आणि विककु विनायकम यांच्यासोबत केलेल्या सहयोगाने भारतीय शास्त्रीय संगीत आणि जॅझचे अभूतपूर्व संमिश्रण घडवून संगीताच्या जागतिक व्यासपीठाला नवीन परिमाण दिले.
पाच वेळा ग्रॅमी पुरस्कार विजेते असलेल्या हुसेन यांनी यंदा ६६ व्या ग्रॅमी पुरस्कारांमध्ये तीन पुरस्कार मिळवले आहेत.
त्यांच्या आरोग्यासंदर्भातील अफवांना फेटाळून लावत कुटुंबीयांनी चाहत्यांना संयम बाळगण्याचे आवाहन केले आहे आणि झाकीर हुसेन यांच्या लवकरच आरोग्यसुधारणा होण्यासाठी प्रार्थना करण्यास सांगितले आहे.
(सर्व हक्क सुरक्षित: २०२४, माझा आवाज न्यूज पोर्टल)
या आणि अशा अनेक ताज्या आणि महत्त्वपूर्ण अपडेट साठी आमच्या फेसबुक व्हॉट्सॲप आणि वेबसाईट वर भेट द्या. को
