प्रसिद्ध तबलावादक उस्ताद जाकीर हुसैन यांचे अमेरिकेत निधन
संपादकीय टीम | माझा आवाज | अपडेट: १६ डिसेंबर २०२४
भारतीय शास्त्रीय संगीताला जागतिक व्यासपीठावर नेणारे आणि तबल्याच्या अनमोल सुरांनी रसिकांच्या हृदयाला जिंकणारे तबलावादक उस्ताद जाकीर हुसैन यांचे अमेरिकेत निधन झाले आहे. ते ७३ वर्षांचे होते.
त्यांना मागील काही दिवसांपासून हृदयविकाराशी आणि फुफूसाशी सबंधीत समस्या होत्या आणि उपचारासाठी त्यांना सॅन फ्रान्सिस्को येथील रुग्णालयात दाखल करण्यात आले होते. उस्ताद जाकीर हुसैन यांचे निधन ही भारतीय आणि जागतिक संगीतसृष्टीसाठी मोठी हानी आहे.
संगीताचा एक सुवर्ण अध्याय संपला
उस्ताद जाकीर हुसैन यांचा जन्म 9 मार्च 1951 रोजी झाला. ते तबलावादक उस्ताद अल्लारखा यांचे सुपुत्र होते. वयाच्या सातव्या वर्षी तबला वाजवण्यास सुरुवात करणाऱ्या जाकीर हुसैन यांनी वयाच्या बाराव्या वर्षीच राष्ट्रीय स्तरावर आपली ओळख निर्माण केली होती.
त्यांनी केवळ भारतीय शास्त्रीय संगीताचाच प्रसार केला नाही तर पाश्चात्त्य संगीताशी शास्त्रीय सुरांचा सुरेख मेळ घालून जागतिक संगीतसृष्टीत आपले नाव कोरले.
अविस्मरणीय कारकीर्द आणि पुरस्कार
उस्ताद जाकीर हुसैन यांना त्यांच्या उत्कृष्ट संगीत साधनेबद्दल अनेक राष्ट्रीय आणि आंतरराष्ट्रीय पुरस्कारांनी सन्मानित करण्यात आले. भारत सरकारने त्यांना 1988 साली पद्मश्री, 2002 साली पद्मभूषण आणि 2023 साली पद्मविभूषण पुरस्काराने सन्मानित केले. 1990 साली संगीत नाटक अकादमी पुरस्कार मिळवणारे ते सर्वात तरुण कलाकार ठरले.
जागतिक संगीत क्षेत्रातील योगदान
चार दशकांपूर्वी ते आपल्या कुटुंबासमवेत अमेरिकेत स्थायिक झाले होते. तेथे त्यांनी शास्त्रीय आणि आधुनिक संगीताच्या क्षेत्रात भरघोस योगदान दिले. अनेक आंतरराष्ट्रीय चित्रपटांसाठी त्यांनी संगीत दिग्दर्शन केले. त्यांच्या तबल्याच्या अप्रतिम परफॉर्मन्सने जगभरातील संगीतप्रेमींना मोहून टाकले.
संगीतासाठीची अखंड साधना
उस्ताद जाकीर हुसैन यांची आठवण त्यांचे संगीत कायम जपून ठेवेल. भारतीय शास्त्रीय संगीताला जागतिक स्तरावर पोहोचवण्याचे त्यांचे योगदान अमूल्य आहे. त्यांच्या निधनामुळे संगीतक्षेत्रात एक मोठी पोकळी निर्माण झाली असून त्यांचा आवाज आणि तबल्याचा ठेका संगीतरसिकांना कायम प्रेरणा देत राहील.
माझा आवाज कडून उस्ताद जाकीर हुसैन यांना विनम्र श्रद्धांजली.
— तुम्हाला आवडते संगीत आणि कलाकारांच्या बातम्या वाचण्यासाठी भेट द्या: www.mazaawaz.in
