५५ हजार जवानांनी सेवा सोडली, ७३० आत्महत्या – राष्ट्रीय सुरक्षा धोक्यात? देश सुरक्षित आहे का?
माझा आवाज विशेष प्रतिनिधी
पुणे, सोमवार, १६ डिसेंबर २०२४: – ५५ हजार जवानांनी सैन्य सोडले, ७३० जवानांची आत्महत्या – केंद्र सरकारची धक्कादायक माहिती
नवी दिल्ली: मागील पाच वर्षांत केंद्रीय सशस्त्र पोलीस दल, राष्ट्रीय सुरक्षा गार्ड (NSG), आणि आसाम रायफल्स यासह निमलष्करी दलातील तब्बल ५५,५५५ जवानांनी सेवा सोडली आहे. त्यात ७३० जवानांनी आत्महत्या केल्याची माहिती केंद्र सरकारने राज्यसभेत दिली आहे.
गृह राज्यमंत्री नित्यानंद राय यांनी खासदार मुकुल वासनिक यांच्या प्रश्नाला उत्तर देताना ही गंभीर माहिती दिली. या आकडेवारीनुसार, ४७,८९१ जवानांनी स्वेच्छानिवृत्ती घेतली, तर ७,६६४ जवानांनी राजीनामा दिला.
आत्महत्या आणि सेवेतील निराशा
मागील पाच वर्षांमध्ये निमलष्करी दलात आत्महत्यांच्या घटनांमध्ये वाढ झाली आहे. यातील जवानांचा मानसिक ताण, कुटुंबापासून दूर राहण्याची वेळ आणि कामाच्या तणावामुळे हे प्रकार घडत असल्याचे सांगितले जाते.
सेवा सोडण्याचे आकडे – चिंतेची बाब
– २०२०: ७,६८४ जवानांनी सेवा सोडली.
– २०२१: १२,०१३ जवानांनी स्वेच्छानिवृत्ती घेतली.
– २०२२: १२,३७१ जवानांनी नोकरी सोडली.
– २०२३: सर्वाधिक १२,३०२ जवानांनी सेवा सोडण्याचा निर्णय घेतला.
राष्ट्रीय सुरक्षेवर परिणाम?
विशेषतः २०२३ मध्ये घडलेल्या मोठ्या प्रमाणातील नोकरी सोडण्याच्या घटनांमुळे राष्ट्रीय सुरक्षेबाबत प्रश्नचिन्ह निर्माण झाले आहे. केंद्र सरकारने जवानांसाठी सवलती आणि सुविधा देऊन त्यांच्या समस्यांवर त्वरित उपाययोजना करणे आवश्यक आहे, असे तज्ज्ञ मत व्यक्त करतात.
सरकारकडून काय भूमिका?
सरकारने जवानांच्या तक्रारी आणि आत्महत्यांचे कारण शोधण्यासाठी एक विशेष समिती स्थापन करण्याचा निर्णय घेतला आहे. तसेच, जवानांच्या मानसिक आरोग्य सुधारण्यासाठी समुपदेशन आणि इतर उपाययोजना केल्या जातील, असे गृह राज्यमंत्री राय यांनी सांगितले.
माझा आवाजच्या वाचकांसाठी प्रश्न:
जवानांच्या समस्या सोडवण्यासाठी सरकारचे प्रयत्न पुरेसे आहेत का? आपले मत आम्हाला नक्की कळवा! आणि ताज्या घडामोडी आणि अपडेट्स जाणून घेण्यासाठी आमच्या माझा आवाज या सोशल मीडिया चॅनेल्सला फॉलो करा.
